អាជ្ញាកណ្តាលបាល់ទាត់ហូឡង់ជាប់បម្រាមមួយជីវិត
សមាគមបាល់ទាត់ហូឡង់ (KNVB) បានសម្រេចព្យួរការងារអាជ្ញាកណ្តាលបាល់ទាត់មួយរូបកាលពីដើមខែឧសភា ២០២៤ មិនអោយពាកព័ន្ធនឹងវិស័យបាល់ទាត់អស់មួយជីវិតក្រោមបទចោទប្រកាន់កាត់ក្តីលម្អៀង និងបានចូលរួមប្រារព្ធពិធីអបអរសាទរដល់ក្រុមដែលទទួលបានជ័យជម្នះ។
លោក Jan Smit ដែលបានធ្វើអាជ្ញាកណ្តាលកាត់ក្តីក្នុងការប្រកួតវគ្គ Play off លីគទី៤រវាងក្លឹប St George និង SV De Valken ដើម្បីសម្រេចថាក្លឹបមួយណាបានឡើងមកលីគទី៣ ត្រូវបានគេរកឃើញថាមានកំហុស៣ធំៗគឺទីមួយលោកបានអោយកាតក្រហមបណ្តេញកីឡាកររបស់ក្លឹបValken៣នាក់និងកាតក្រហមទី៤បណ្តេញសមាជិកគ្រូបង្វឹក ចេញពីទីលាន។ទីពីរលោកអនុញ្ញាតិអោយមានមានការបន្ថែមម៉ោង១៥នាទីនិងទី៣ លោកបានចូលរួមច្រៀងអបអរសាទរនិងលើកពានជាមួយក្លឹបដែលឈ្នះ St George។
សេចក្តីថ្លែងការណ៍របស់សមាគមបាល់ទាត់ហូឡង់បានថ្លែងថា ព្រឹកនេះ យើងបានជូនដំណឹងដល់លោក Smit ថាចាប់ពីពេលនេះតទៅលោកមិនអាចធ្វើជាអាជ្ញាកណ្តាលបានទៀតទេ។ យើងរំពឹងថាលោកនឹងមានអាកប្បកិរិយាអព្យាក្រឹតក្នុងនាមជាអាជ្ញាកណ្តាលសម្រាប់ក្រុមទាំងពីរ តែផ្ទុយទៅវិញលោកបានល្មើសច្បាប់។
ជុំវិញនឹងបញ្ហានេះលោក Smit បាននឹងសម្បារយ៉ាងខ្លាំងចំពោះការសម្រេចចិត្តរបស់សមាគមបាល់ទាត់ហូឡង់ដែលបានព្យួរគាត់អស់មួយជីវិត ដោយអះអាងថាគាត់បានប្រារព្ធពិធីជាមួយក្លឹបផ្សេងទៀតកាលពីអតីតកាល។លោកបន្តថាការសម្រេចចិត្តរបស់ KNVB ធ្វើឡើងដោយមិនមានការស៊ើបអង្កេត។ លោកបានទទូចថា ការសម្រេចចិត្តព្យួរបែបនេះគឺហួសហេតុ។ លោកអះអាងថាខ្ញុំមិនបានជប់លៀងជាមួយកីឡាករទេ! ខ្ញុំច្រៀងបានតែមួយបទនិងលើកពានបានតែម្តងប៉ុណ្ណោះ៕
