កីឡាករអង់គ្លេស នឹងចំណាយប្រាក់រាប់ម៉ឺនដុល្លារលើវិធានការសន្តិសុខកម្រិតយោធាដើម្បីការពារផ្ទះរបស់ពួកគេក្នុងអំឡុងប្រកួតយ៉ូរ៉ូ បន្ទាប់ពីមានក្រុមចោរតែងតែចូលលួចទ្រព្យសម្បត្តិរបស់តារាបាល់ទាត់ល្បីៗនៅ Premier League ។
ពួកគេគ្រោង នឹងចំណាយលុយប្រហែលជាង៣០ម៉ឺនដុល្លារ លើកាមេរ៉ាអ៊ីនហ្វ្រារ៉េដ និងកាមេរ៉ាពេលយប់ បូករួមទាំងសន្តិសុខការពារសុវត្ថិភាព២៤ម៉ោង សម្រាប់រយៈពេលនៃការប្រកួតនៅប្រទេសអាល្លឺម៉ង់។ អតីតបុគ្គលិកកងកម្លាំងពិសេសក៏នឹងត្រូវបានជួលឱ្យយាមផ្ទះរបស់ពួកគេក្នុងអំឡុងពេលការប្រកួតយូរ៉ូដែលនឹងប្រព្រឹត្តទៅចាប់ពីថ្ងៃទី ១៤ខែមិថុនាដល់ថ្ងៃទី១៤ ខែកក្កដា។ កីឡាករអង់គ្លេសដែលមានមូលដ្ឋាននៅទីក្រុង Manchester បានពិភាក្សារួចហើយអំពីផែនការក្នុងការជួបជុំគ្រួសារនាពេលថ្មីៗនេះ។ កីឡាករខ្លះបានដំឡើងបន្ទប់ការពារភ័យស្លន់ស្លោនៅក្នុងផ្ទះប្រណីតរបស់ពួកគេរួចហើយ ក្នុងការប៉ុនប៉ងរក្សាសុវត្ថិភាពមនុស្សជាទីស្រឡាញ់ ដើម្បីឆ្លើយតបទៅនឹងនិន្នាការនៃការកំណត់គោលដៅវាយប្រហារទៅកីឡាករបាល់ទាត់។
យោងតាមប្រភពមួយបានប្រាប់ The Mirror ថា ប្រព័ន្ធសុវត្ថិភាពសម្រាប់ផ្ទះមួយគឺមានតម្លៃចន្លោះពី១៤ទៅ ១៨ម៉ឺនដុល្លារ និងការជួលសន្តិសុខយាមពេញម៉ោងសម្រាប់ការប្រកួត EURO ។ ពួកគេត្រូវកក់សន្តិសុខសម្រាប់រយៈពេលមួយខែនៃការប្រកួត ក្នុងករណីដែលអង់គ្លេសឡើងដល់វគ្គផ្តាច់ព្រ័ត្រ។ ដូច្នេះ វិក្កយបត្រសន្តិសុខចុងក្រោយរបស់ពួកគេមានតម្លៃប្រហែលជាងជាង៣០ម៉ឺនដុល្លារ ។ ខ្សែការពារ Harry Maguire របស់ Manchester United អ្នកចាំទី Jordan Pickford របស់ Everton និងខ្សែបម្រើ Jack Grealish របស់ Manchester City ស្ថិតក្នុងចំណោមអ្នកដែលមានផែនការសន្តិសុខថ្មី។ ការពង្រឹងសុវត្ថិភាពនេះកើតឡើងបន្ទាប់ពីការវាយឆ្មក់ដ៏គួរឱ្យភ័យខ្លាចជាបន្តបន្ទាប់ទៅលើតារា Premier League ។ Jack Grealish ត្រូវបានក្រុមចោរវាយឆ្មក់យកគ្រឿងអលង្ការតម្លៃជាង១ លានដុល្លារនៅថ្ងៃ Boxing Day ខណៈដែលគ្រួសាររបស់គាត់នៅខាងក្នុង៕
ប្រភព៖ The Mirror
