៤ ក្រុមកំពុងតែដណ្តើមគ្នាយ៉ាងស្វះស្វែងក្នុងតំណែង Top ៤
ការប្រកួតប្រជែងកៅអី Top ៤ នៃក្របខណ្ឌលីគកំពូលកម្ពុជា Cambodia Premier League រដូវកាល ២០២៣-២៤ កាន់តែក្ដៅគគុកហើយ បន្ទាប់ពី Tiffy Army FC ឈ្នះ អាយអេសអាយ ចាញ់។
ជាការពិតណាស់! នៅក្នុងជំនួបសប្តាហ៍ទី ២៥ នៃក្របខណ្ឌលីគកំពូលកម្ពុជា Cambodia Premier League រដូវកាល ២០២៣-២៤ ក្រុម Tiffy Army FC បានទទួលជ័យជម្នះទៅលើក្រុមវិសាខា នៅក្នុងដី ដោយបញ្ចប់លទ្ធផល ២-១ ខណៈដែលក្រុមអាយអេសអាយ ដង្កោសែនជ័យ បានបរាជ័យក្រោមថ្វីជើងក្រុមម្ចាស់ផ្ទះគិរីវង់សុខសែនជ័យ ដោយបញ្ចប់លទ្ធផល ៤-២ ស្របពេលក្រុមម្ចាស់ផ្ទះបឹងកេត ក៏បានទទួលជ័យជម្នះលើក្រុមណាហ្គាវវើលដ៍ ដោយបញ្ចប់លទ្ធផល ១-០ ផងដែរ..។
លទ្ធផលបែបនេះបានធ្វើឱ្យតំណែង Top ៤ នៅក្នុងក្របខណ្ឌលីគកំពូលកម្ពុជា Cambodia Premier League រដូវកាល ២០២៣-២៤ កាន់តែក្ដៅគគុកហើយ ដោយគម្លាតពីគ្នាតែប៉ុន្មានពិន្ទុប៉ុណ្ណោះ ពោលគឺក្រុមលេខ ៣ វិសាខា មាន ៣៨ ពិន្ទ, ក្រុមលេខ ៤ បឹងកេត មាន ៣៧ ពិន្ទុ ហើយក្រុមលេខ ៥ អាយអេសអាយ មាន ៣៤ ពិន្ទុ និងក្រុមលេខ ៦ Tiffy Army FC មាន ៣៣ ពិន្ទុ ខណៈដែលនៅសល់ ២ ប្រកួតទៀត នឹងឈានទៅចូលវគ្គខ្វែង។
គួរបញ្ជាក់ថា គិតត្រឹមសប្តាហ៍ទី២៥ នៃក្របខណ្ឌលីគកំពូលកម្ពុជា Cambodia Premier League រដូវកាល ២០២៣-២៤ ក្រុមការពារតំណែងជើងឯកភ្នំពេញក្រោន កំពុងតែប្រដេញតាមពីក្រោយក្រុមព្រះខ័នរាជស្វាយរៀង ដែលជាក្រុមកំពុងឈរនៅកំពូលតារាងក្នុងលីគជាបណ្នោះអាសន្នចំនួន៧ពិន្ទុ៕
